బ్లాగుశతకానికి నా సమిథ

(8-22-2008. తప్పులు దిద్దబడినవి.  వీవెన్ గారు మర్చిపోయినవి చేర్చవచ్చు అని రాశాక గుర్తు వచ్చినవి చేరుస్తున్నాను చివర, క్షమాపణలతో. తే. 23 ఆగస్ట్.) 

 

వీవెన్ గారు కూడలిద్వారా మనకి చేస్తున్న సాయం అమోఘం. మీకు ఏవి నచ్చేయో ఎందుకు నచ్చేయో .చెప్పండి అని ఆయన ఆడిగారు కనక రాస్తున్నాను ఇది. 

 

నిజం చెప్పాలంటే ఇది చాలా కష్టం నాకు. ఎందుకంటే నా పరిధి చాలా చాలా చిన్నది.

ప్రపంచసాహిత్యం> తెలుగు సాహిత్యం> కథలు> ఆధునిక కథలు> నేను పుట్టినతరవాత వచ్చిన కథలు. కొండొకచో నేను రాసిన కథలు మాత్రమే. ఇక బ్లాగులు చూస్తే, వీవెన్ వంద మంచి బ్లాగులు అన్నారు కనక రెండో మూడో వందల తెలుగు బ్లాగులు వున్నాయనుకుంటున్నాను. అందులో బాగా రెగ్యులర్‌గా అప్‌డేట్ చేస్తున్నవారు వందమందే అని నా అనుమానం.

ఇందులో 90 శాతం నాపరిధికి మించినవే. తలుచుకుంటే నాచిన్నప్పుడు చదివిన పడవవాడు-వేదపండితుడు కథ జ్ఞాపకం వస్తోంది. నాచదువు నిరర్థకం.

నాకు తెలీనివీ, అర్థం కానివీ - , ప్రపంచ సాహిత్యం, కవిత్వం, ఛందస్సూ, సంస్కృతం, రాజకీయాలూ హైదరాబాదులో స్థానిక రాజకీయాలూ, ఆఫీసులూ, కాలేజీ హాస్యాలూ, క్రికెట్టూ, యువ స్పిరిటు, సైన్సు ఫిక్షను, సాంకేతికం, హైందవమూ తదితర నమ్మకాలూ, సినిమాలూ, నటనటీవర్గం, సంగీతం, చిత్రకళ, ఛందస్సు, పిండివంటలూ, సాధారణ వంటలూ, నగలూ, చీరెలూ.. .

ఈ వడబోత అయింతరవాత, మిగిలినివి ఏమిటి? అందులో నేను చూసేవి ఎన్ని? ప్చ్. అయినా వీవెన్‌గారి కూడలిద్వారా నేను పొందుతున్న లాభం అద్వితీయం. ఈమధ్య కూడలికి నలత చేసినప్పుడేం అయిందో తెలుసా. నా ముందువారం బ్లాగుకి వచ్చిన హిట్టులతో పోలిస్తే మరుసటి వారం బ్లాగుకి 94 శాతం పడిపోయాయి.. పాథెటిక్ అంది నాస్నేహితురాలు. (కన్నీరు తుడుచుకుంటూ రాస్తున్నా). అంచేత నాకు తోచిన అభిప్రాయాలు చెప్తాను. ఎవరినీ కించపరిచే వుద్దేశ్యం లేదు.

 

సాధారణంగా బ్లాగుల్లో సరదాగా చెప్పుకునే ఆషామాషీ కథలూ, కథలకి సంబంధించిన వ్యాసాలు చూస్తాను, సుజాత (మనసులో మాట), సుజాత (గఢ్డిపూలు), మీనాక్షి, పూర్ణిమా, లచ్చిమీ, శ్రీవిద్య, ఇంకా “ఎల్లుండి వచ్చిన రెండు పల్లు చూపించిన” బాలకిశోరం ఎవరో గుర్తు రావడం లేదు, మీరెవరైనా తెలిస్తే చెప్పండి  … వీరందరూ చూపుతున్న కొత్తపోకడలు, క్రియెటివిటీ మెచ్చుకోదగ్గది. నాకు చాలా బాగుంది. ఇక్కడే మరోమాట కూడా చెప్తాను. profile, word verification — ఈమెట్లు గెలిచి కామెంట్లు ఇవ్వడం కష్టంగా వుంది. అంచేత నాకామెంటు కనిపించకపోతే అపార్థం చేసుకోవద్దని మనవి.

పూర్ణిమా, సుజాత, మరియు సుజాత కథలమీదా, పుస్తకాలమీదా రాస్తున్న సమీక్షలు కూడా నాకు చాలా బాగున్నాయి. సౌమ్య సరేసరి పుస్తకాల పురుగు అన్నారెవరో. కానీ సినిమాలగురించి, పాటలగురించీ, అనువాదాలగురించీ కూడా రాస్తోంది కదా. తనబ్లాగు నేను ఎక్కువగానే చూస్తాను. కామెంట్లు ఒక్కోసారి తనకే నేరుగా ఇస్తాను.

సాహిత్యవ్యాసాలకీ, కవితలకీ కల్పనా రెంటాలని చెప్పుకోవాలి. తను బ్లాగుకి కొత్త అయినా పాఠకలోకానికి పాతకాపే. నేను తన వ్యాసాలూ, కవితలూ ఇదివరకే చూసాను కనక గట్టిగా చెప్పగలను తనబ్లాగు మంచి బ్లాగు అని. అలాగే మరొక మంచి బ్లాగరు శారద (ఆస్ట్రేలియా). కూడలిలో అట్టే కనిపించకపోయినా - ఈమధ్య తన కథ, ఆడది కోరుకునే వరం -మీద వచ్చిన చర్చ తప్పించి. మంచికథలతోపాటు స్ఫూర్తిదాయకమైన వ్యాసాలు కూడా రాస్తోంది.

కవితలు - నాకు అట్టే అర్థం కావు. బాగున్నట్టు అనిపిస్తాయి కాని ఏమిటి బాగుంది, ఎందుకు బాగుంది అంటే చెప్పలేను. ఈమాట అంటే రాధిక “అలా అనకండి, మీరు కూడా కవితలు రాస్తారు కదా” అంది! మరి నేను ఏంరాస్తున్నానో నాకు తెలుసు కదా. J). ఇంతకీ అలా తెలిసీ తెలీని జ్ఞానాజ్ఞానాలతో నేను చదివే కవితలు రాధిక, నిషిగంధ, బుల్లోజుబాబా, స్వాతికుమారి,  ఇంకా నాబ్లాగులో వ్యాఖ్యలిచ్చినవారి అందరి బ్లాగులూ చూస్తాను కనీసం వాళ్లేం రాస్తున్నారో తెలుసుకోడానకి. సిరిసిరిమువ్వ గారి సరిగమలులాటివి  చూస్తూంటాను.  ఆవిడ క్రికెట్ లాటి విషయాలు రాయగలరు.

ఎప్పుడో మర్చిపోయిన తెలుగుపద్యాలని గుర్తు చేస్తూనూ, కొత్తగా కొన్నిటిని పరిచయం చేస్తూనూ, భైరవభట్ల కామేశ్వరరావుగారు నడుపుతున్న తెలుగుపద్యం నాకు చాలా నచ్చిన బ్లాగు.

 

సర్వశ్రీ కొత్తపాళీ, సీబీరావు, రాజేంద్రకుమార్ - వీరు రాస్తున్న టపాలకంటె తమవ్యాఖ్యలతో బ్లాగరులకి ఇచ్చే ప్రోత్సాహం ఎక్కువలా కనిపిస్తోంది. అది వారి ఔదార్యం. మన భాగ్యం. అలాగే, చదువరీ, వికటకవీ, ప్రవీణ్ గార్లపాటి, మొదలైనవారెందరో మంచి బ్లాగులు నడుపుతున్నారు.

మహేష్ కుమార్ బ్లాగుమీద చర్చచురుగ్గా వచ్చింది శివ ధర్మమా అని. ఈవిషయంలో సాటి బ్లాగరులు నెట్ మర్యాదలు మరొకసారి అందరికీ గుర్తుకి తీసుకురావడం ముదావహం. మహేష్‌కుమారే చెప్పినట్టు శివకి తమ అభిప్రాయాలు వెలిబుచ్చడానికి అధికారం వుంది. ఆయన కొత్తబ్లాగరులకి మార్గదర్శకులు కావాలనుకుంటే “ఈఒక్క బ్లాగునీ చూడకండి” అని హెచ్చరించడంతో సరిపుచ్చక, ఏబ్లాగులు చదివి కొత్త బ్లాగరులు ప్రభావితులు కాగలరో కూడా చెప్పివుంటే వారు తమ వ్యాఖ్య, తమకొచ్చిన భాషలో సమదృష్టితో చేసేరనే నమ్మకం నాకు కలిగి వుంటేది. బ్లాగులోకానికి సంబంధించినంతవరకూ బ్లాగే బ్లాగరు. ఇది వ్యక్తిగత దూషణ కాదంటే నమ్మడం కష్టం.

 

మాటవరసకి, జ్యోతి గారు ప్రమదావనంలోనూ ఇతరత్రా మంచి జోరూ, హుషారూ గల బ్లాగరు. ఆవిడ ప్రచురించిన తిట్లదండకం నాకు బాగులేదు. అంతమాత్రాన నేను వారి బ్లాగు చూడడం మానేయలేదు, మరొకరిని అటు వెళ్లకండి అని హెచ్చరించనూ లేదు. ఎవరి పరిధిలో వారు రాస్తూ, ఎదటివారి అభిప్రాయాలని గౌరవించడం కూడా బ్లాగులో ఒక సామాజిక ధర్మమే అని నావిశ్వాసం.

పుస్తకప్రచురణవిషయమై నేను రాసినప్పుడు, తెలుగు’వాడి’ని గారు శ్రమతో చాలా విషయాలు సేకరించి పంపారు. వేరే టపా రాస్తానని మాట కూడా ఇచ్చారు. అలాగే మరికొందరు మంచి బ్లాగరులు తాడేపల్లి బాలసుబ్రహ్మణ్యం గారి సంస్కృతపాఠాలూ, వికటకవి గారి చమక్కులు… ఇలా కొన్ని కోణాల్లో నాకు నచ్చిన విషయాలు గల బ్లాగులు కూడా వున్నాయి. అలాగే ఏకాంతపు దిలీపు గారు కూడా మంచి టపాలు రాస్తున్నారు.

 

ఇక్కడ ఉదహరించకపోయినా నేను ఇతరబ్లాగులు కూడా చూస్తూంటాను అప్పుడపుడూ ఏమీ అర్థం కాకపోయినా :p.

 

 

(ఆగస్ట్ 2008. )