అచ్చేసుకున్న పుస్తకం – రెండో భాగం.

 

 

అచ్చేసుకున్న పుస్తకం - రెండో భాగం.

 

వెనక టపాలో క్రియేట్‌స్పేస్ డాట్ కామ్  సంస్థ ఎలా పని చేస్తుందో మళ్లీ రాస్తానని చెప్పేను కదా. ఆమాట చెప్పడానికే ఈ టపా.

 

మామూలుగా చాలా పి.ఒ.డి (పబ్లిష్ ఆన్ డిమాండ్) వాళ్లు కొంత సెటప్ ఫీ అడుగుతారు. 600నుండి మూడు వేల డాలర్లవరకూ వుండొచ్చు మనం వాళ్ల సాయం ఎంతవరకూ అడుగుతాం అన్నదాన్ని బట్టి. క్రియెట్ స్పేస్ లో సెటప్ ఫీ లేదు. ఇన్ని కాపీలు మనం కొని తీరాలన్న నియమం లేదు. సర్వహక్కులూ మనవే. మనం మళ్లీ ఇంకోచోట కావలిస్తే ప్రచురించుకోవచ్చు. వాళ్లు ఇచ్చిన ISBN నెంబరు వాడుకోడానికి మాత్రం వీల్లేదు. ఇప్పుడు నేను ఇండియాలో నాపుస్తకం ప్రచురించుకోవాలంటే, మరో ASIN నెంబరుతో ఇదే పుస్తకం ప్రచురించుకోవచ్చన్నమాట. చేద్దాం అనుకుంటున్నాను కూడా కేవలం ఇండియాలో మార్కెట్ చెయ్యడానికి,.

 

 క్రియేట్.కాం, వారు కొన్ని గైడులైనులు ఇస్తారు. పుస్తకం మొత్తం అట్టలషోకునించీ లోపలిపేజీలవరకూ వాళ్ల గైడ్ లైనులకి అనుగుణంగా తయారుచేసి ఇవ్వాలి, పిడియప్.లో ఫార్మాట్ చేసి ఇవ్వాలి. రకరకాల సైజులన్నాయి. ఏసైజు అన్నది మన ఇష్టం. కవరు పేజీ సొంతంగా తయారు చేసుకోడం చేతకాకపోతే వాళ్ల టెంప్లేటు వాడొచ్చు. ఆటెమ్‌‌ప్లేటుమీద బొమ్మలూ, అక్షరాలూ పెట్టడానికి ఏదో ఫొటో సాఫ్టువేరు వాడాలి. నేను వాడినవి రెండు. Paint.NET. ఇది వుచితంగా డౌన్లోడ్ చేసుకోవచ్చు. రెండోది Roxio Easy DVD/CD Creatorతో వచ్చిన PhotoSuite 9. ఇది కొన్నాను. దీనితోనే ఎక్కువ తంటాలొచ్చేయి.

పెయింట్.నెట్ బాగానే పని చేసింది. ఎటొచ్చీ నాకున్న నసాంకేతిక పరిజ్ఞానంతో దాన్ని సాధించడానికి మూడు వారాలు పట్టింది. అంతా అయింతరవాత, వాళ్లకి పంపిస్తే, బొమ్మ 300 డిపిఐ వుండాలి, నువ్వు పంపింది 96 డిపిఐలో వుంది, బొమ్మ స్ఫుటంగా రాదు పుస్తకం అట్టమీదు అన్నారు.

సరే నేను తంటాలు పడలేనని ఆపీసుమాక్సుకి తీసుకెళ్లి నాకెలా కావాలో అంతా చెప్పి, చెయ్యమన్నాను. 20 డాలర్లు ఇచ్చుకుని అతనిచేత చేయిస్తే, అదీ నేను చేసినట్టే బొమ్మ 300 డిపిఐలో లేదు. అప్పుడు నేనే కూర్చుని బొమ్మ 300 డిపిఐకి సరిదిద్ది, ఆఫీసుమాక్సుకి ఇచ్చి పీడియఫ్‌గా మార్చమని చెప్పేను. ఇంతకీ చెప్పొచ్చేదేమిటంటే ఇదంతా మొదటి పుస్తకంతో, రెండో పుస్తకం తయారు చేసే వేళకి నేనే పిడియఫ్. కూడా చేసుకోగల స్థితికి వచ్చేను.

మొత్తంమీద పుస్తకం తయారయింది. ప్రతి స్టెప్పులోనూ క్రియేట్.స్పేస్ వారు  నేను అడిగిన ప్రశ్నలన్నిటికీ వెంటవెంటనే స్పష్టంగా, వివరంగా జవాబులిస్తూ వచ్చేరు. నిజంగా ఇంత ప్రొఫెషనలిజం చూపిన సంస్థ నాకు తటస్థపడడం ఇదే మొదలు.

నాలుగు రోజులకిందట నా డెస్క్‌టాపు కూలిపోయింది. నా ఫైళ్లన్నీ తుడిచిపెట్టుకుపోయేయి. అందులో ముఖ్యమైనవి నేను ఈమధ్య పబ్లిష్ చేసిన రెండుపుస్తకాలు. క్రియేట్.స్పేస్ వారిని అడిగితే, ఆ ఫైళ్లు వాళ్లు వెంటనే పంపించారు. ఆఆనందంలోనే ఈటపా రాస్తున్నాను.

 

అలాగే మార్కెటింగు సలహాలు చెప్పమని అడిగితే కూడా చాలా వివరాలతో మంచి సలహాలు ఇచ్చారు. అంచేత కూడా రాస్తున్నాను. మీకు ఎవరికైనా ఉత్సాహం వుంటే క్రియేట్.స్పేస్‌ ని సంప్రదించి చూడండి.

మార్కెటింగుకి వారిచ్చిన సలహాల్లో ఒకటి ఎమెజాన్ డాట్ కామ్‌లో పాఠకులచేత రెవ్యూలు రాయించాలి అన్నది. మన పుస్తకసమీక్షలలా పేజీలకి పేజీలు రాయక్కర్లేదు. కాని కొనదలుచుకునేవారికి ఈపుస్తకంలో ఏం వుందో తెలిసేలా వుండాలి.

 

నారెండో పుస్తకం, తెలుగు రచయిత్రుల,మీద  170 జీలు. అందులో ఆనాటి రచయిత్రులు, వెనకటి రచయిత్రులతో పోలిస్తే, ఏవిషయాల్లో ముందంజ వేశారు, వారికి కుటుంబంలోనూ, సమాజంలోనూ పరిస్థితులు ఎలా దోహదం చేసాయి, వారు తీసుకున్న కథాంశాలేమిటి, వార రచనల్లో పాఠకులని ఆకట్టుకున్న విశిష్టాంశాలు ఏమిటి, పాఠకుల స్పందనకీ పండితుల అంచనాలకీ మధ్య గల అంతరం ఎటువంటిది,  … వంటి వివిధ అంశాలు చర్చించాను.

తెలుగు చదవడం రానివారిని దృష్టిలో పెట్టుకుని రాసిన పుస్తకం కనక అందులో విషయ చర్చ తదనుగుణంగానే వుంటుంది.

 

(మా.ని. సెప్టెంపరు 2008. )