ఊసుపోక – నిన్నరాత్రి కాల్పులు – అదేలెండి బాణాసంచా పండుగంట!

(ఎన్నెమ్మ కతలు 77)

ఇక్కడ జులై నాలుగు బాణాసంచా వెలుగులు చూడ్డానికి వెళ్ళడం మానేశాను చాలాకాలంగా. ఎందుకంటే ఊరుబయట ఆరుబయల్లో జరుగుతాయి అవి స్థానిక ప్రభువుల ఆధ్వర్యంలో.
ఊళ్ళోవాళ్ళందరూ ఆరుగంటలకే వెళ్ళి, దుప్పట్లు పరుచుకుని తెచ్చుకున్న హాంబర్గర్లు తింటూ, బీరు తాగుతూ కబుర్లు చెప్పుకుంటూ కూర్చుంటారు బాణాసంచా ప్రేలుళ్ళు మొదలయేవరకూ. అవి చీకటి పడ్డాక జరగాలి అంటే కనీసం తొమ్మిదన్నర దాటాలి. అంటే అంతవరకూ అలా కబుర్లు చెప్పుకుంటూ కూర్చునే ఓపిక కావాలి. రెండోది దోమలు. అవును, ఇక్కడ కూడా దోమలబాధ కూడా ఎక్కువే. ఆ పైన జనసందోహం. కారులో సుమారుగా ఏ ఎనిమిది గంటలకో బయల్దేరితే, దాదాపు మైలున్నర దూరం నడవాల్సొస్తుంది అప్పటికే వచ్చి ఉండిన కార్ల మూలంగా.
ఇంతకీ నిన్న ఏం జరిగిందంటే, నేను పడుకుని ఉండగా డబ్ డబ్మని చప్పుడు వినిపించింది. మాంఛినిద్రలో ఉన్న నేను ఉలిక్కిపడి లేచి ఆ తరవాత భయపడ్డాను. ఈ సమయంలో మాయింటికొచ్చి తలుపు తట్టేవాళ్ళెవరున్నారు, దొంగేమో అని. ఆ పైన కొన్ని సినేరియోలు ఊహించుకుని మరింతభయపడి, మళ్ళీ నాకు నేనే ధైర్యం చెప్పుకుని, లేచి తలుపుదగ్గరికొచ్చి, గాజుకన్నంలోంచి చూసేను. అక్కడెవరూ లేరు.
హమ్మయ్య అనుకుని, ఇంతా డబ్ డబ్ వినిపిస్తుంటే ఉరుములు కాబోలు, వాన వస్తుంది కాబోలు అనుకుంటూ చూస్తున్నాను.
అప్పుడు వెలిగింది బల్బు ఇది జులై నాలుగు సంబరాలేమోనని. చూద్దాం ఎటునించి వస్తున్నాయో అనుకుని తలుపు తీసుకుని బయట చూశాను.
ఆశ్చర్యం.
మాఇళ్ళపక్కనే ఉన్న గాల్ఫ్ కోర్సులోంచి వస్తున్నాయి నేరుగా మాముంగిట్లోకి. ఎంత ముంగిట అంటే నేను నాలుగడుగులు బయటికొస్తే ఆ నిప్పు రవ్వలు నామీద పడతాయేమోనని భయమేసింది.
చుట్టూ చూశాను నాలాగే మిగతా వాటాల్లో ఉన్నవాళ్ళు కూడా బయటికి వచ్చి చూస్తారేమోనని. ఎక్కడా నరసంచారం లేదు.
నాకు నవ్వొచ్చింది. కిందటివారం నాకోసం ప్రత్యేకం నాట్యప్రదర్శన.
ఇవాళ నా ముంగిట నాకొక్కదానికే కనిపిస్తున్న దీపావళి బాణా సంచా! నేను ఈ దేశం వచ్చేక ఈ బాణాసంచా సంరంభం ఇంతగా చూసి ఆనందించింది ఇదొక్కటేనేమో. ఈ ఏడు నాజాతకం భలే మారిపోయినట్టుంది. హా. హా.

 

(జులై 4, 2011.)