లలితగారి కథ మీ అభిప్రాయాలకోసం

నా శ్రవ్యటపాలకి స్పందించి, నా కోరిక మన్నించి తన కథ పంపిన లలితకి కృతజ్ఞతలు.

ఈకథమీద మీ అభిప్రాయాలూ, సూచనలూ తెలియజేయవలసిందిగా అర్థిస్తున్నాను – మాలతి.

————————————————–

‘ రహస్య ‘ నివేదిక  !

రచన: లలిత దాట్ల.

కాపీరైటు: రచయిత్రి.

*****************

పెద్దల  పర్యవేక్షణలో ఏర్పాటు చేయబడ్డ  ఏంకాంతంలో వాళ్ళిద్దరూ……. అలసి సొలసి ……, అనుభూతిస్తూ ఆమె, అలసటగా అతను …..

“  నీకేవిష్టం ?” అనాసక్తిగా అడిగాడతను

” వానంటే ఇష్టం , ఊ..ఇంకా కొండలు లోయలు, అడవులు సముద్రం …..ఆశక్తిగా చెపుతుందామె….

“ఛా …అదికాదు”  విసుక్కునాడతను . తినేవి తాగేవీ….?

“ఆలోచించిందామె …..నాకు తీపిష్టం , పులుపూ ఇష్టమే ….వగరూ చేదూ కూడా నచ్చుతుంది …..”

” నాకు మాత్రం కారం ఒకటే ఇష్టం . తీపంటే వెగటు ….అయినా చేదును కూడా ఇష్టపడతారా ఎవరైనా పిచ్చిదాన్లా వున్నావే ….”

కాసేపు మౌనం తర్వాత ……”  నీకేం కావాలన్నా సంకోచించకుండా అడుగు . ఇకనుంచీ నీ బాధ్యతంతా నాదే  భరించువాడు భర్త అన్నారుకదా ! చెప్పు నీకేం కావాలి అజ్ఞాపిస్తున్నట్టుగా  అన్నాడతను.

ఆరాధనగా చూసిందామె  ..  ……. “ మీ ప్రేమ ఆదరణ …..

చిద్విలాసంగా చూశాడతను . “నీనుంచీ నేనేం కొరుకుంటున్నానో తెలుసా ……..నా  ఇల్లాలిగా నువ్వు నా ఇంటిని స్వర్గసీమ చెయ్యాలి.  నా వాళ్ళందరినీ నీ సేవలతోనూ ఆప్యాయత తోనూ మురిపించాలి. నా కొచ్చే ఆదాయానికి తగ్గట్టూ నువ్వు పొదుపు నేర్చుకోవాలి. నా పిల్లలికి మంచి బుద్దులు నేర్పి వాళ్ళని నా వంశోద్ధారకులుగా గర్వపడేలా తీర్చిదిద్దాలి ……. కుటుంబ పరువు మర్యాదలకు భంగం   కలగకుండా చూసుకోవాలి . మంచి ఇల్లాలిగా ఇంటా బయటా  పేరు తెచ్చుకోవాలి ….. అంతేకాదు…..

“ ఆ……”ఆవులించిందామె…

” నిన్నే ….ఏంటి నిద్రా …కుదిపి లేపాడటను . ఇంకా చాలా మాట్లాడుకోవాలి ఈ రాత్రి   మనం ఒకరినొకరం  పూర్తిగా అర్ధం చేసుకోవాలి   …..

” నీకెవరిష్టం ….. మగపిల్లాడేగా  ”చిలిపితనం చిలకరించాడటను .

సిగ్గుతో తడిసి ముద్దయిందామె .“ఆడపిల్ల అయితే బావుంటుంది   ” అంది మురిపెంగా  . ఎంచక్కా పరికిణీలు వెయ్యొచ్చు .జడగంటలు మువ్వలపట్టీలు పెట్టొచ్చు….. నాట్యం నేర్పించొచ్చు బాగా చదివించి   డాక్టర్ ని  చెయ్యొచ్చు  ఊహల్లో వూరేగుతుందామె

“ఇంకా నయం …!  అమ్మాయికి  గోపాలరావు పేరెలా పెడతాం . ముందు మనకి అబ్బాయి పుట్టాలి వాడికి మా తాత పేరు పెట్టాలి . వాడివల్ల మనవంశం వృద్దిపొందాలి ……ఆ తరవాత  అమ్మాయో అబ్బాయో …ఎవరైనా పర్లేదు దృఢంగా చెప్పాడటను . నిరాశగా చూసిందామె .

కొన్ని క్షణాలు నిశ్శబ్ధం తర్వాత …”ఇందాకా చెప్పానోలేదో  ….. చేపల పులుసంటే చెవికోసుకుంటాను నేను . బాగా మసాలా దట్టించి ఎక్కువసేపు మరగపెట్టీ…..మా అమ్మ చేస్తుందీ భలేవుంటుందిలే . మా సుగుణక్క  మాంసం బాగా వండుతుంది బావకి నచ్చేలా వండటం నేర్చుకుంది. పెళ్ళికాకముందు అసలు వంటింటి చాయలకే వచ్చేదికాదు అని అమ్మ తిట్టేదిలే. మా గోపీగాడున్నాడుకదా అదే, పెళ్ళిలో వెదురుబద్దలా ఉన్నారు వదినగారు అని నిన్ను ఆటపట్టించాడే వాడే… ,ఆ గోపీగాడు ఒకసారి వేటకెళ్ళి అడవిపందిని కొట్టుకొచ్చాడు . నిజంగా వాడే వేటాడి తెచ్చడేమో అని మేం అంతా ఆశ్చర్యపోయాం . ఆహా ఒహ  అని వాడిని ,వాడు కొట్టుకొచ్చిన పందిని ఊరంతా ఊరేగించి ఓరలు వాటాలేసి వండుకుతిన్నాం .అంతా అయ్యాకా అందరం అరుగులమీద దొర్లుతూ  ఒరేయ్ గోపీ ఎలా కొట్టావో చెప్పరా అని ఆసక్తిగా అడిగాం . వాడి వీరోచిత గాధ వినాలని అంతా చెవులు రిక్కించుకున్నాం . వాడు  పళ్ళికిలిస్తూ  చెప్పాడు గదా………  ఓరి వెర్రి నాగన్నల్లారా కొట్టుకొచ్చాను అంటే అర్ధం కాలా…ఎవరో వేటాడి పొదల్లో దాచిన   దాన్ని  నేను దొంగతనంగా ఎత్తుకొచ్చాను అని చెప్పేసి  చక్కా పోయాడు .హ..హ..హ..   ఆ తర్వాత వాడి వీపు విమానం మోత మోగించేశాం అనుకో ……..అవునూ నీకు వంటొచ్చుకదా ! ఆరాగా అడిగాడు  ఆయాసం తీర్చుకుంటూ …..

“భలే.. వెన్నెలలో……  తిరగడమంటే………. నాకూ……. భలే ఇష్టం . మత్తుగా చెప్పిందామె ఒక్కో మాట వెతుక్కుంటూ…..”

తనచేతిలో ఉన్న ఆమె చేతిని విదిలించాడటను. “ఓయ్..మొద్దూ …ఏంటానిద్ర . నిద్ర మొహం ఎరగని దాన్లా  .  వంటొచ్చా అని అడుగుతున్నాను . వెర్రిదాన్లా ఆ పలవరింతలేవిటీ , వెన్నెలా వల్లకాడూ అంటూ…..”విసుక్కున్నాడతను  .

తడబడి లేచికూర్చుందామె …..ఏంటండీ , ఏవన్నారూ ……ఊరికే అలా కునుకుపట్టేసింది ..సంజాయిషీగా అంది .

తన విసుగును చిరాకును అదుపు చేసుకుటున్నట్టు గట్టి నిట్టూర్పు విడిచి , ఆమెవైపు తిరిగి” నీకు వంటొచ్చా అని అడిగాను , నాకు చేపల పులుసంటే ఇష్టమని చెప్పాను …… “అన్నాడు నిదానంగా

” ఓ అదా  ….అదీ నాకు రాదండీ,  చాలా మామూలుగా అంది.

“మరేం వచ్చు ……..ముగ్గులెయ్యటం , అడాళ్ళంతా చేస్తుంటారే …..గుమ్మాలకి లేసులల్లటం వంటివి అవొచ్చా ….వెటకారంగా అన్నాడతను

ఉహు…అవి నాకు నచ్చవు . నాకు బొమ్మలెయ్యటం వచ్చు  , పాడటం ఇష్టం ……గొంతెత్తి పాడటం నాకెంతో బావుంటుంది   .  ఇంకా చదవటం రాయటం…. ఉత్సాహంగా చెప్పుకుంటూ పోతుంది.

నిరసనగా  చూసాడు .  ” హు….. మా నాన్నని అనాలసలు  , కట్నానికి ఆశపడి నన్ను ముంచేశాడు….. అహంకారాన్ని కుమ్మరిస్తూ  , అసహనంగా అటు తిరిగి పడుకున్నాడతను

అమ్మ చెప్పింది నిజమేనేమో…..వంట చెయ్యటం ఒక్కటీ వస్తే సరిపోయేది . మిగతావన్నీ ఎన్నొచ్చీ ఎందుకు దండగ …..

ఎంత కష్టవయినా సరే తొందరగా  చేపలపులుసు చెయ్యటం నేర్చేసుకోవాలి …. అనుకుంటూ , అపరాధ భావనని నిండా కప్పుకుని  ఆవేదనగా  ఇటు తిరిగి పడుకుందామె.

**************

సరిగ్గా పాతికేళ్ళ పది నెలల తర్వాత  …..

పెద్దల ప్రమేయం పెద్దగా లేకుండానే , తమంత తాముగా ఏర్పాట్లు చేసుకున్న ఏకాంతం లో ……అతడు ఆమె….

“  మనం రెండేళ్ళనుంచీ లవ్ లో వున్నాం అయినా…. నువ్వు నన్ను పూర్తిగా అర్ధం చేసుకోలేదేమో అనిపిస్తుంది “అన్నాడతను .

సందేహంగా  చూసిందామె

“నాకు  రెడ్ కలర్ ఇష్టమని తెలిసీ …  వైట్ సేరీ  కట్టుకున్నావ్ ….”ఉడుక్కుంటూ చెప్పాడు

“అహ…అలాకాదు , ఇప్పుడు తెలుపైతే బావుంటుందనీ …..”మెల్లగా అంది

“వస్తుంటే అమ్మేం చెప్పిందో తెలుసా …..” ముంగురులు సవరిస్తూ అగాడు  .

ఏంటన్నట్టు చూసిందామె

“మందులు మాకులూ జోలికి పోకుండా  ఒక మనవణ్ణి కని నా ఒళ్ళో పడెయ్యండి . ఆ తర్వాత ఏం చేసుకున్నా  మీ ఇష్టం అంది “ . మురిసిపోతూ చెప్పాడతను

“అహ…అది కాదు మరీ….” ఏదో చెప్పబోయిందామె …..

“పెద్దలని గౌరవించడం మన ధర్మం. మా ఇంట్లో అమ్మ ఎలా చెపితే అలా….నువ్వుకూడా మా సాంప్రదాయాల్ని, కుటుంబ పద్ధతుల్ని అలవాటు చేసుకోవాలి . అందరినీ ఆప్యాయంగా ఆదరించాలి . ఇంట్లోనూ బయటా అన్నివిధాలా నాకు సపోర్ట్ గా వుండాలి    . నా మనసుకు నచ్చినట్టూ నిన్ను నువ్వు మార్చుకోవాలి.  ఇంకా …….”

‘ ఆ….  ” ఆవులించిందామె

“ఏంటీ అపుడే నిద్రా ……ఒకరినొకరం పూర్తిగా అర్ధం చేసుకోటానికి ఇదే మంచి సమయం . లేలే….”

“ఇంకేంవుందీ అర్ధం చేసుకోటానికి ….”బద్ధకంగా అందామె

“నీకు  జాబ్  చెయ్యటం ఇష్టం లేదని చెప్పావట ….అమ్మతో …”

“అవును……నువ్వు బాగానే సంపాదిస్తున్నావ్ గా ..నేను ఇంట్లోనే వుంటూ నా మనసుకు నచ్చిన పనేదయినా …..”

“అదికాదురా….  ఇంట్లో కూర్చొని ఏం చేస్తావ్ ……వంట చెయ్యటం కూడా ఓ పనేనా …. కావాలంటే వంటమనిషిని పెట్టుకోవచ్చు  అర్ధం చేసుకో ..డబ్బెవరికి చేదు … ఎందుకు మంచి సేలరీ వదులుకోవటం …..ఇద్దరి జీతాలు కలిస్తే త్వరగా సెటిల్ అవ్వొచ్చు….. బరువంతా ఒక్కడ్నే మొయ్యాలంటే ఎలా….” నా మాటవిను…. మృదువుగా  అన్నాడతను

“  మ్యూజిక్  నేర్చుకోవాలని ఎప్పటినుంచో ఆశ ….చదువుతో కుదర్లేదు సగంలో ఆగిపోయింది  . అందుకే ఇప్పుడు……”సందేహిస్తూ ఆగింది

“నాన్సెన్స్…….పాటలు, ఆటలు , వంటా ,వార్పూ …..ఎందుకవన్నీ …… జాబ్  వుంటే సొసైటీ లో స్టేటస్ పెరుగుతుంది అర్ధం చేసుకోవేం  అసహనంగా అన్నాడు .

మౌనంగా వుండిపోయిందామె ……

నా ఫ్రెండ్స్ అంతా  ఒక రేంజ్ లో   వున్నారు . ఇంటి బాధ్యతంతా నామీద వుండటంతో నేనే వెనకబడిపోయాను . ఇద్దరం జాబ్స్ చేస్తే త్వరలోనే మనం ఒక పొసిజషన్ కి చేరుకుంటాం ……అసలు నీ క్వాలిఫికేషన్ చూసే….ఏదో గుర్తొచ్చినట్టూ హటాత్తుగా  ఆగిపోయాడు .

” ఏవిటీ  …..” సందేహంగా చూసిందామె

“అహ ఏం లేదు ……..అవునూ……అదీ……” మాట దాటేసే ప్రయత్నంలో మాటలు  వెతుక్కుంటూ ఆమెకి దగ్గరయ్యాడు .

అనుమానంతో అన్యమనస్కంగా  ఆమె…. ఆలోచనలను సాగదీస్తూ అతి చాక చక్యంగా అతను   …….   ఆత్మలను విడదీసి శరీరాల్ని కలుపుతూ  మరో తరానికి ఊపిరిపోసే  పనిలో పడ్డారు .

అలా తరాలు మారుతునే ఉన్నాయ్ , మారాల్సినవి ఎప్పటికీ మారకుండా అలానే ఉంటున్నాయ్

నాలుగు గోడలమధ్య  మనసులు నలుగుతూనేవున్నాయ్ , నలుగురి మధ్యకూ వచ్చి ఆదర్శదంపతులుగా కొనియాడబడుతున్నాయ్