పతంజలి యోగసూత్రములు I సమాధి పాదము

 

Do not copy, translate or disseminate this matter in any manner. That is copyright violation.

హెచ్చరిక: ఇది యోగసూత్రములకు భాష్యము కాదు. వివరణలూ, విశ్లేషణలూ లేవు.

———————–

యోగసూత్రములు సంస్కృతంలో అనల్ప అర్థం కలిగిన చిన్న వాక్యాలు. ఆ పొందిక చెప్పలేనంత అర్థవంతంగా అనిపించడంచేత వాటికి అర్థాలు తెలుస్తే బాగుండు అనుకున్నాను.

నాలుగైదు ఇంగ్లీషు పుస్తకాలూ, రెండు తెలుగు పుస్తకాలు చూసేను. అవి అన్నీ కూడా పాఠకుడికి ఇంతో అంతో తాత్వికమైన అవగాహన ఉంది అన్న ప్రాతిపదికమీద రాసినట్టు ఉన్నాయి. వస్తువు అలాటిది అనుకున్నా నాకు మాత్రం అవి చదివి అర్థం చేసుకోడం కష్టమే అయింది.

ఆకారణంగా సూత్రాలకి సుమారుగా తెలుగు అర్థాలు తెలిస్తే ఆ పుస్తకాలు అర్థమవుతాయి అనిపించి ఈ పనికి పూనుకున్నాను. ఇక్కడ నేను చేయడానికి ప్రయత్నించింది కేవలం సంస్కృతవాక్యం తెలుగులో పెట్టడం మాత్రమే. తెలుగు నేర్చుకోవాలనుకునేవారికి ఓనమాల వంటిది.

నేను ఇది మొదలు పెట్టేక కనీసం నాలుగు రోజులకి ఒకరూ ఇద్దరూ నా కృషియందు ఆసక్తి చూపుతున్నారు. Facebookలో closed group పెట్టేను. కానీ పాఠకుల ఆసక్తి చూసినతరవాత నా బ్లాగులో కూడా పెడితే బాగుంటుంది అనిపించింది.

మరొకసారి హెచ్చరిస్తున్నాను. నాకు ఈ విషయంలో ఎట్టి అవగాహన లేదు. మీకు కలిగిన సందేహాలకి ఇతర వనరులు చూడండి.

———————-

పతంజలి యోగసూత్రములు తెలుగులో

 

(అక్టోబరు 9, 2015)

పతంజలి యోగసూత్రములు తెలుగులో

 

  1. అథ యోగానుశాసనమ్

(అథ యోగ అను శాసనమ్)

– యోగసాధన విధానము తెలుసుకొనుటకు ఇది సమయము (సాధకునిజీవితంలో తగిన సమయము)

  1. యోగశ్చిత్త వృత్తి నిరోధః

(యోగః చిత్తవృత్తి నిరోధః)

– యోగము అంటే చిత్తవృత్తులను నిరోధించడం.

నిరోధము అంటే యోగసాధనకి అంతరాయమైన చిత్తవృత్తులను గుర్తించి, వాటిప్రభావములనుండి తప్పుకుని యోగసాధన కొనసాగించడం.

3.తదా ద్రష్టుస్స్వరూపేఽవస్థానమ్

(తదా ద్రష్టుః స్వరూపే అవస్థానమ్)

– ఆ విధంగా చిత్తవృత్తులను అధిగమించగలిగినవాడు యోగస్థితిలో తనను తాను దర్శించుకోగలుగుతాడు. అంటే చిత్తవృత్తులను తిరస్కరించిన లేదా ధిక్కరించిన స్థితిలో దర్శించకోగలుగుతాడు.

  1. వృత్తి సారూప్యమితరత్ర

(వృత్తి సారూప్యమ్ ఇతరత్ర)

– ఇతరులు ఆ చిత్తవృత్తులప్రభావములకు లోనై, వాటిప్రకారం ప్రవర్తిస్తారు.

  1. వృత్తయః పంచతయ్యః క్లిష్టాఽక్లిష్టాః

(వృత్తయః పంచతయ్యః క్లిష్టాః అక్లిష్టాః)

– ఈ చిత్తవృత్తులు ఐదు విధములు. తేలికగా అధిగమించగలిగినవి కొన్ని. శ్రమతో కూడినవి కొన్ని.

  1. ప్రమాణ విపర్యయ వికల్ప నిద్రా స్మృతయః

అవి సత్యము, సత్యముగా స్ఫురించే అసత్యము, భ్రాంతి (ఊహాజనితము), నిద్ర, స్మృతి

  1. ప్రత్యాక్షానుమానాఽగమాః ప్రమాణాని

(ప్రత్యక్ష అనుమాన ఆగమాః ప్రమాణాని)

– ప్రమాణములు ప్రత్యక్షముగా చూచినవి (తెలుసుకొన్నవి), తర్కముద్వారా తెలుసుకొన్నవి, పరంపరానుగతముగా శాస్త్రములలో సత్యముగా అంగీకరించబడినవి.

  1. విపర్యయో మిథ్యాజ్ఞానమతద్రూపప్రతిష్ఠమ్.

(విపర్యయః మిథ్యా జ్ఞానమ్ అతత్ రూప ప్రతిష్టమ్)

– సత్యము కాని దానిని సత్యమని భ్రమ పడడం విపర్యయము.

  1. శబ్దజ్ఞానానుపాతీ వస్తుశూన్యో వికల్పః

(శబ్ద జ్ఞాన అనుపాతీ వస్తుశూన్యః వికల్పః)

– వస్తువు శబ్దము ఆలంబనగా రూపాన్ని సంతరించుకుంటున్నది. వస్తువు లేని పదం వ్యర్థం. శబ్దమునే వస్తువు అనుకోడం వికల్పం.

  1. అభావప్రత్యయాఽలంబనా వృత్తిర్నిద్రా.

(అభావ ప్రత్యయ ఆలంబనా వృత్తిః నిద్రా)

– పరిసరములను గమనించకుండా తామసప్రవృత్తిలో ఉండడం (జడభరతునివలె). అంటే జాగ్రదవస్థలో ఉంటూనే నిద్రాస్థితిని (పరిసరాలగురించిన స్పృహ లేని స్థితి) అనుభవంలోనికి తెచ్చుకొనగలగడం.

  1. అనుభూతవిషయాఽసంప్రమోషః స్మృతిః

(అనుభూత విషయాః అసమ్ప్రమోషః స్మృతిః)

– అనుభవాలు మనసుపై వదలని ముద్రలే జ్ఞాపకములు. లేదా విడిచిపెట్టలేని అనుభవాల చిహ్నములే స్మతులు. వీటినే వాసనలు అని కూడా అంటారు.

  1. అభ్యాసవైరాగ్యాభ్యాం తన్నిరోధః

(అభ్యాస వైరాగ్యాభ్యాం తత్ నిరోధః)

– ఈ వృత్తులను నివృత్తి చేయడం (అదుపులో ఉంచడం) అభ్యాసమువలన వైరాగ్యమువలన సాధ్యం.

  1. తత్ర స్థితౌ యత్నాభ్యాసః

(తత్ర స్థితౌ యత్నః అభ్యాసః)

– ఆ స్థితి ప్రయత్నమువలన సాధ్యం కాగలదు.

  1. స తు దీర్ఘకాలనైరంతర్య సత్కారాఽసేవితో దృఢభూమిః

(స తు దీర్ఘకాల నైరంతర్య సత్కారః ఆసేవితః దృఢభూమిః)

– ఆ సాధన చాలా కాలము నిరవధికంగానూ భక్తిభావముతోనూ కొనసాగించినప్పుడు మాత్రమే స్థిరంగా సాగుతుంది.

  1. దృష్టాఽనుశ్రవిక విషయవితృష్ణస్య వశీకారసంజ్ఞా వైరాగ్యమ్

(దృష్ట అనుశ్రవిక విషయ వితృష్ణస్య వశీకార సంజ్ఞా వైరాగ్యమ్)

– తాను చూస్తున్న విషయాలలోనూ, పరంపరానుగతంగా వింటూ వస్తున్న విషయాలలోనూ ఇచ్ఛ లేకపోవడమే వైరాగ్యం (వైరాగ్యానికి చిహ్నం).

  1. తత్పరం పురుషఖ్యాతేర్గుణవైతృష్ణ్యమ్.

(తత్ పరం పురుష­ ఖ్యాతే గుణ వైతృష్ణ్యమ్)

– త్రిగుణాలలో (సత్వ తమో రజో గుణాలు) విముఖుడయిన సాధకునికి పరమ పురుషునిగూర్చి కలిగిన జ్ఞానము కలగుతుంది. అదే ఉత్తమోత్తమమయిన జ్ఞానము.

  1. వితర్క విచారాఽనందాస్మితాస్వరూపానుగమాత్ సంప్రజ్ఞాతః

(వితర్క విచార ఆనంద అస్మితా స్వరూప అనుగమాత్ సంప్రజ్ఞాతః)

– తర్కించుకొనడము, నిశిత పరిశీలన, బ్రహ్మానందము, అహమిక (అస్మితా) – ఈ నాలుగు పద్ధతులు ప్రజ్ఞతో కూడిన సమాధికి మార్గములు. ఈ పద్ధతిలో సాధించిన స్థితి సబీజసమాధి. ఈ స్థితిలో “నేను సమాధిస్థితిని పొందాను” అన్న ఎఱుక ఉంది.

  1. విరామప్రత్యయాభ్యాసపూర్వస్సంస్కారశేషోఽన్యః

(విరామ ప్రత్యయ అభ్యాసపూర్వః సంస్కారశేషః అన్యః)

– ఎఱుకతో ప్రయత్నం చేస్తూ ఇతర సంస్కారాలను (చిత్తవృత్తులను) వెనక్కి మళ్ళించి సాధన కొనసాగించడం మరొక పద్ధతి.

  1. భవప్రత్యయో విదేహ ప్రకృతిలయానామ్

(భవ ప్రత్యయః విదేహ ప్రకృతి లయానామ్)

– స్థూలశరీరమును విడిచినవారికి(విదేహ), ప్రకృతిలో లయమైనవారికి (ప్రకృతిలయానామ్) ముందు జన్మలో ప్రోది చేసుకున్న స్మృతులు పునర్జన్మకి కారణమవుతాయి. (ఈ సమాధిస్థితి వెనకటిజన్మలో సమాధి కంటే పైస్థాయే అయినా, సంపూర్ణ సమాధి కాదు.)

  1. శ్రద్ధావీర్యస్మృతిసమాధి ప్రజ్ఞాపూర్వక ఇతరేషామ్

(శ్రద్ధా వీర్య స్మృతి సమాధి ప్రజ్ఞా పూర్వకః ఇతరేషామ్)

– ఇతరులు పూర్వజన్మలో తాము పెంపొందించుకున్న శ్రద్ధ, తేజస్సు, తపోబలం, స్మృతులు, జ్ఞానముద్వారా తరువాతి జన్మలో క్రమంగా సమాధి స్థితి సాధించగలుగుతారు.

  1. తీవ్రసంవేగామాసన్నః

(తీవ్ర సంవేగానాం ఆసన్నః)

– తదేకదృష్టితో గట్టి పట్టుదలతో సాధన చేసేవారికి సంప్రజ్ఞత త్వరగా సిద్ధిస్తుంది.

  1. మృదు మధ్యాధిమాత్రత్వాత్ తతోఽపి విశేషః

(మృదు మధ్య అధిమాత్రత్వాత్ తతః అపి విశేషః)

– సమాధి సిద్ధించగలదు అన్నది సాధన స్థాయిని బట్టి ఉంటుంది. సాధన అచంచల దీక్షతో చేసేది కావచ్చు. లేదా మధ్యస్థంగానో అతి సాధారణంగానో సాగించేది కావచ్చు.

  1. ఈశ్వర ప్రణిధానాద్వా

(ఈశ్వర ప్రణిధానాత్ వా)

– ఈశ్వరుని యందు తదేకనిష్ఠ నిలిపి ధ్యానించడం ద్వారా కూడా చేయవచ్చు.

  1. క్లేశకర్మవిపాకాఽశాయైరపరామృష్ట పురుషవిశేష ఈశ్వరః

(క్లేశ కర్మవిపాక ఆశాయై అపరామృష్టః పురుష విశేష ఈశ్వరః)

– దుఃఖము, కర్మఫలములు, పూర్వజన్మలో సంతరించుకున్న స్మృతులతాలూకు ఛాయలు – ఇవి అంటని (అతీతుడైన) పరమపురుషుడే ఈశ్వరుడు.

  1. తత్ర నిరతిశయం సర్వజ్ఞ బీజం

(తత్ర నిర్ అతిశయం సర్వజ్ఞ బీజమ్)

– ఆ పరమపురుషునిలో సంపూర్ణ జ్ఞానబీజము ప్రతిష్ఠమై ఉన్నది.

  1. పూర్వేషమపి గురుః కాలేనానవచ్ఛేదాత్

(పూర్వేషాం అపి గురుః కాలేన అనవచ్ఛేదాత్)

– ఆ పరమపురుషునికి కాలపరిమితి లేదు (ఏ ఒక్క కాలానికి చెందనివాడు). అందుచేత పరంపరానుగతంగా వస్తున్న గురువులందరికీ కూడా ఆయనే గురువు.

  1. తస్య వాచకః ప్రణవః

– ఓంకారముఈశ్వరునికి సంజ్ఞామాత్రమైన శబ్దము.

  1. తజ్జపస్తదర్థభావనమ్.

(తత్ జపః తత్ అర్థ భావనమ్)

ఈశ్వరభావమునందు దృష్టి నిలిపి ఆ ఓంకారమును సదా జపించాలి.

  1. తతః ప్రత్యక్చేతనాధిగమోఽప్యంతరాయాభావశ్చ

(తతః ప్రత్యక్ చేతన అధిగమః అపి అంతరాయ అభావః చ)

– ఆ జపముద్వారా సాధకుని చేతన అంతర్ముఖమయి ఆటంకాలను అధిగమించగలదు.

  1. వ్యాధి స్త్యాన సంశయ ప్రమాదాలస్య అవిరతి భ్రాంతిదర్శనాలబ్ధభూమికత్వ అనవస్థిత్వాని చిత్తవిక్షేపాస్తే అంతరాయాః

(వ్యాధి స్త్యాన సంశయ ప్రమాద ఆలస్య అవిరతి భ్రాంతిదర్శన అలబ్ధభూమికత్వ అనవస్థిత్వాని చిత్తవిక్షేపాః తే అంతరాయాః)

– వ్యాధి, తామసం (కాలయాపన), సంశయం, నిర్లక్ష్యం లేక అలసత్వం, భోగలాలసత, అవాస్తవాన్ని వాస్తవంగా భ్రమించడం, యోగసాధన ఏకోన్ముఖంగా కొనసాగించలేకపోవడం, స్థిరత్వం లోపించడం – ఇవన్నీ యోగసాధనకి ఆటంకాలు.

  1. దుఃఖ దౌర్మనస్యాంగమేజయత్వశ్వాసప్రశ్వాసా విక్షేప సహభువః

( దుఃఖ దౌర్మనస్య అంగమేజయత్వ శ్వాస ప్రశ్వాసాః విక్షేపసహ భువః)

– దుఃఖము, నిస్పృహ (నిరాశ), శరీరంలో వణుకు, క్రమబద్ధం కాని ఉచ్ఛ్వాసనిశ్వాసాలు – ఇవి మనసుని నిలకడ లేకుండా చేస్తాయి.

  1. తత్ప్రతిషేధార్థం ఏకతత్త్వాభ్యాసః

(తత్ ప్రతిషేధ అర్థం ఏక తత్త్వ అభ్యాసః)

వీటిని అధిగమించి ధ్యానం కొనసాగించడానికి సాధకుడు ఒక పద్ధతిని ఎంచుకుని ఆ పద్ధతిలో దృఢచిత్తంతో సాధన కొనసాగించాలి.

  1. మైత్రీ కరుణా ముదితోపేక్షాణాం సుఖదుఃఖ పుణ్యాపుణ్య విషయాణాం భావనాతః చిత్తప్రసాదనమ్.

(మైత్రీ కరుణా ముదిత ఉపేక్షాణాం సుఖ దుఃఖ పుణ్య అపుణ్య విషయాణాం భావనాతః చిత్త ప్రసాదనమ్)

– సుఖదుఃఖాలు, పాపపుణ్యాలవిషయంలో ఉదాసీనతతోనూ, స్నేహం, కరుణ, ప్రసన్నత వంటి సుగుణాలతోనూ ఉంటే చిత్తము ప్రశాంతమయి యోగసాధన సాగుతుంది.

  1. ప్రచ్ఛర్దన విధారణాభ్యాం వా ప్రాణస్య

– ఉచ్ఛ్వాసనిశ్వాసాల నియంత్రణద్వారా కూడా చిత్తమును అదుపులో ఉంచుకొనవచ్చు.

  1. విషయవతీ వా ప్రవృత్తిరుత్పన్నా మనసః స్థితినిబంధినీ

(విషయవతీ వా ప్రవృత్తిః ఉత్పన్నా మనసః స్థితినిబంధినీ)

– ఇంద్రియములద్వారా అనుభవమయే విషయాలలో ఒకదానిపై చిత్తము స్థిరంగా నిలపడంద్వారా కూడా అన్య విషయాలనుండి దృష్టి మరలి చిత్తాన్ని స్థిరంగా ఉంచుకోవచ్చు.

  1. విశోకా వా జ్యోతిష్మతీ

– దుఃఖానికి అతీతమైన అంతర్జ్యోతిమీద దృష్టి నిలపడానికి ప్రయత్నించడం మరో పద్ధతి.

  1. వీతరాగ విషయం వా చిత్తమ్

– మమతానురాగములను వదులుకోడంద్వారా కూడా స్థిరచిత్తము కలుగుతుంది.

  1. స్వప్న నిద్రా జ్ఞానాఽలంబనం వా

(స్వప్న నిద్రా జ్ఞాన ఆలంబనమ్ వా)

– స్వప్నములు లేని గాఢనిద్రద్వారా లేదా నిద్రలో వచ్చిన కలలను విశ్లేషించుకోవడంద్వారా కూడా చిత్తశాంతిని పొందవచ్చు.

  1. యథాఽభిమత ధ్యానాద్వా

(యథా అభిమత ధ్యానాత్ వా)

– ఎవరికి వారు తమకి అనుకూలమైన పద్ధతిలో చిత్తమును దృఢపరుచుకొనవచ్చు.

  1. పరమాణు పరమ మహత్వాంతఽస్య వశీకారః

(పరమ అణు పరమ మహత్వ అంతః అస్య వశీకారః)

– ఆ అభ్యాసమువలన సాధకునికి అణువునించి బ్రహ్మాండంవరకూ సమస్తమూ స్వాధీనము కాగలదు.

  1. క్షీణవృత్తేరభిజాతస్యేవ మణేః గృహీతృ గ్రహణ గ్రాహ్యేషు తత్థ్స తదఞ్జనతా సమాపత్తిః

(క్షీణ వృత్తేః అభిజాతస్య ఇవ మణేః గృహీతృ గ్రహణ గ్రాహ్యేషు తత్థ్స తత్ అఞ్జనతా సమాపత్తిః)

– అవాంతరములయిన చిత్తవృత్తులు పరిహరించినతరువాత – గ్రహించినవాడు, గ్రహణశక్తి, ఆ గ్రహణానికి కేంద్రమైన వస్తువు – ఈ మూడు అంశాలను సమస్థితిలో దర్శించగలుగుతాడు. స్వచ్ఛమైన మణిపూస ఏ వస్తువుమీద ఉంచితే ఆ వస్తువు రంగును ప్రతిఫలించినట్టు సాధకుడి చిత్తము పరమాత్మస్వరూపాన్ని గ్రహించడానికి సిద్ధమై ఉంటుంది.

  1. తత్ర శబ్దార్థ జ్ఞానవికల్పైః సంకీర్ణా సవితర్కా సమాపత్తిః

(తత్ర శబ్ద అర్థ జ్ఞాన వికల్పైః సంకీర్ణా సవితర్కా సమాపత్తిః)

– సమాపత్తి అంటే శబ్దము, అర్థము, వస్తువు – ఈ మూడింటిని గూర్చి తర్కించుకొను సమయంలో గల మానసిక స్థితి.

  1. స్మృతిపరిశుద్ధౌ స్వరూపశూన్యేవ అర్థమాత్రనిర్భాసా నిర్వితర్కా

(స్మృతి పరిశుద్ధౌ స్వరూప శూన్యా ఇవ అర్థమాత్ర నిర్భాసా నిర్వితర్కా)

– సాధనద్వారా చిత్తము పరిశుద్ధమైన అనంతరం వస్తురూపం, అర్థం, శబ్దాలకు సంబంధించిన తర్కం కూడా ముగుస్తుంది.

  1. ఏతయైవ సవిచారా నిర్విచారా చ సూక్ష్మవిషయా వ్యాఖ్యాతా

(ఏతయా ఇవ సవిచారా నిర్విచారా చ సూక్ష్మవిషయా వ్యాఖ్యాతా)

పై సూత్రాలలో సవిచార సమాధి, నిర్విచార సమాధి, తద్వారా సూక్ష్మవిషయానికి సంబంధించిన జ్ఞానం ఎలా ఆర్జించుకొనవచ్చునో వివరించడం జరిగింది.

  1. సూక్ష్మవిషయత్వం చ అలింగపర్యవసానం.

ఆ సూక్ష్మవిషయంగురించిన అవగాహనద్వారా ఆ సూక్ష్మవిషయానికి మించిన రూపము లేని ఉత్కృష్ట పరమపురుషుడు ధ్యేయము కాగలడు.

  1. తా ఏవ సబీజః సమాధిః

– ఇది బీజముతో కూడిన సమాధి. ఈ సాధనలో సాధకుడు సూక్ష్మవిషయాలను అధిగమించినా సాధకుడి చిత్తములో ఒక రూపము (బీజము) ఆలంబనముగా ఉంటుంది.

  1. నిర్విచార వైశారద్యే అధ్యాత్మప్రసాదః

– ఈ నిర్విచారస్థితి పొందిన అనంతరం సాధకుడికి ఆధ్యాత్మికజ్ఞానం కలుగుతుంది.

  1. ఋతంభరా తత్ర ప్రజ్ఞా

– సాధకుని చిత్తము పరమోత్కృష్టమైన ఋతము (సత్)తో నిండిపోతుంది.

  1. శ్రుతానుమానప్రజ్ఞాభ్యాం అన్యవిషయా విశేషార్థత్వాత్

(శ్రుత అనుమాన ప్రజ్ఞాభ్యాం అన్య విషయా విశేషార్థత్వాత్)

– ఇంతవరకూ వివరించిన సాధనవలన పొందిన బ్రహ్మానందము – అనుశ్రుతంగా అభ్యసించినది, తర్కంద్వారా గ్రహించినది, తనకు తానుగా అర్థం చేసుకున్నది – స్థిరంగానూ సమతుల్యము అయినదిగానూ ఉంటుంది.

  1. తజ్జ సంస్కారోఽన్యసంస్కార ప్రతిబంధీ

(తత్ జః సంస్కారః అన్య సంస్కార ప్రతిబంధీ)

– ఆ విధంగా పొందిన ఆత్మజ్ఞానము సాధకునికి గల వెనకటి ప్రవృత్తులను, స్మృతులను అన్నిటినీ నిరోధిస్తుంది. అయితే ఇప్పుడు కూడా సాధకునికి తానొక జ్ఞానమును పొందేను అన్న స్పృహ అంతర్గతంగా ఉంటుంది.

  1. తస్యాపి నిరోధే సర్వన్నిరోధాన్నిర్బీజస్సమాధిః

(తస్య అపి నిరోధే సర్వనిరోధాన్నిర్బీజః సమాధిః)

ఆ జ్ఞానమును కూడా నిరోధించినతరవాత పొందిన స్థితి నిర్బీజసమాధి.

పతంజలి యోగసూత్రములు సమాధి పాదము సమాప్తము.

వ్యాఖ్యలు విషయానికి పరిమితం చేయవలెను. నాధ్యేయానికి అనువు అనుకున్న వ్యాఖ్యలు మాత్రమే అంగీకరిస్తాను. తెలుగులిపిలో లేని వ్యాఖ్యలు, fake idతో వచ్చిన వ్యాఖ్యలు అంగీకరించబడవు.

—-

(సంస్కరణ 2 తేది 1-24-2016)

గ్రంధకర్త మాలతి

పేరు నిడదవోలు మాలతి. మంచి తెలుగులో రాసిన కథలు చదువుతాను. చక్కని తెలుగులో రాయడానికి ప్రయత్నిస్తాను.

6 thoughts on “పతంజలి యోగసూత్రములు I సమాధి పాదము”

  1. సంతోషం మల్లాప్రగడ రామకృష్ణ గారూ. అవును. ఈ సూత్రాలలో నిత్యజీవితంలో అన్వయించుకోగల విషయాలు చాలానే ఉన్నాయి. త్వరలోనే మిగతా భాగాలు కూడా పెడతాను.

    ఇష్టం

  2. సేకరించి తెలుగు చదివే వారికి అందించిన వారికి, సహకరించిన ప్రతిఒక్కరికి ధన్యవాదములు తెలియ అరుస్తున్నాను, పతంజలి 13 వ సూత్రమ్ నాకు బాగా నచ్చింది ” ఆ స్థితి ప్రయత్నం వళ్ళ సాద్యం “

    ఇష్టం

టపాలో చర్చించిన అంశంమీద వ్యాఖ్యానాలు తెలుగులో రాసిన వ్యాఖ్యలు మాత్రమే అంగీకరింపబడతాయి. తెంగ్లీషులో రాసిన వ్యాఖ్యలు కూడా నాకు సమ్మతం కాదు. కోరుతున్నాను

Fill in your details below or click an icon to log in:

WordPress.com Logo

You are commenting using your WordPress.com account. Log Out / మార్చు )

Twitter picture

You are commenting using your Twitter account. Log Out / మార్చు )

Facebook photo

You are commenting using your Facebook account. Log Out / మార్చు )

Google+ photo

You are commenting using your Google+ account. Log Out / మార్చు )

Connecting to %s