మనలో మనమాట 21 – నా వంటలపుస్తకం రెండే పుటలు!

ఆర్నెల్లయింది నా వంటింటి సంబరాలగురించి రాసి (గొలుసు ఇక్కడ). నేను ఆర్నల్లకొకమారైనా పాకగృహము ప్రవేశించి పావనం చేస్తానని మీరు అనుకోవాలని.

ఈమారు స్ఫూర్తి నిన్న మధ్యాహ్నం నా నిత్యసంచారానికి తలుపు తీస్తే కనిపించిన దృశ్యం!

DSC00066
గుమ్మడికాయ

ఇదేమిటి ఎగిరే పళ్ళెం వచ్చి నాముంగిట వాలినట్టు, గ్రహాంతరవాసులైనా వేంచేసేరా అభ్యాగతలుగా దిక్కులు చూసేను. చూసి జడుసుకున్నాను అనలేను కానీ ఉలిక్కిపడ్డమాట వాస్తవం. తరవాత, బహుశా ఇదేదో నాకు తెలీని సంప్రదాయం కాబోలు, ఇవాళ గుమ్మడికాయ పంచిపెట్టే దినం కాబోలు అనుకుని చుట్టూ ఉన్న గుమ్మాలముందు చూసేను. మరెక్కడా కనిపించలేదు. పైగా ఇది అద్దెవాటా భవంతి కనక ఎవరికీ గుమ్మడితోటలు వేసుకునే అంత స్థలం ఉండదు.

ఈ కాయ చూసి అనుమానించడానికి కారణం నా దుర్భర మానసికస్థితి. తెల్లారి లేస్తే వార్తలనిండా హత్యలూ, మారణహోమాలూ. అంచేత నా బుర్రనిండా అవే ఆలోచనలు.  ఇంకోటి కూడా ఉంది. ఈ కాల్పులూ, కాబోయే అధ్యక్షుల వెకిలిమాటలూ భరించలేక Forensic files, Investigation Discovery Channel అదే పనిగా చూస్తున్నాను. ఈ రెండు ఛానెళ్ళూ ఒక్క వారం రోజులు చూస్తే చాలు ఒక ప్రాణం తియ్యడానికి ఎన్ని రకాల ప్రయోగాలున్నాయో క్షుణ్ణంగా తెలిసిపోతుంది. మొన్నటికి మొన్న ఒక ప్రబుద్ధుడు భార్య మరణించిన సమయంలో తాను దేశానికి ఆవలితీరంలో ఉన్నానని సోదాహరణంగా తన నిర్దోషిత్వాన్ని నిరూపించాడు. తీరా చూస్తే ఆ కుటిలుడు చేసిన కుట్ర ఏమిటంటే ఊరు విడిచి పోయేముందు ఉప్పులో సైనైడు కలిపడం. పాపం, ఆ ఇల్లాలు ఆ ఉప్పు ఆమ్లెట్ మీద చల్లుకుని ప్రాణంమీదకి తెచ్చుకుంది. ఇలాటివి చూసేక ఎవరికైనా ఏమనిపిస్తుంది చెప్పూ.

ఈ కారణాలన్నిటిమూలంగా నాకు రాకూడని ఆలోచనలు వచ్చేయి. కానీ ఏం చెయ్యను? నాకసలు ఈ చుట్టుపట్ల ఎవరితోనూ అంత ఇచ్చి పుచ్చుకునే పరిచయాలు లేవు. ఆఖరికి తెగించి భవంతి మేనేజరుని పిలిచి అడిగేను ఆ కాయ ఇంట్లోకి తెచ్చుకునేముందు. అదృష్టవశాత్తు ఆవిడకి తెలుసుట ఎవరై ఉంటారో. చెప్పింది ఫలానావాటాలో ఆవిడ వాళ్ళ చుట్టాల తోటలోంచి నాలుగో పదో కాయలు తెచ్చేనని ముందురోజు మేనేజరుకి చెప్పిందిట.

ఆ కాయవల్ల ప్రమాదం లేదని దృఢపరుచుకున్నాక లోపలికి తెచ్చి, పరిశోధన మొదలు పెట్టేను యం.ఫిల్. కోసం కష్టిస్తున్నంత దీక్షగా. మొదట పేర్లు చూడు –  Peter pan squash, white summer scalloped squash, white summer squash అని తెలిసింది. నాకు మాత్రం UFO squash అనాలనుంది. పోనీ, విష్ణు చక్రాలు అనో దాకగుమ్మడికాయ అనో మనం పేరు పెట్టుకుందామా అని ఆలోచిస్తున్నాను

నామకరణం తరవాత చూద్దాం ఎలా వండుకు తినడమా అని ఆలోచించేను. ఇది నేనెప్పుడు చూడలేదు కనక వండలేదని వేరే చెప్ఫఖ్ఖర్లేదు. సుమారుగా గుమ్మడికాయలా కనిపిస్తోంది కనక అదే పద్ధతి దీనికి కూడా పనికొస్తుందని నిర్ణయించుకున్నాను. కానీ అన్నీ అనుమానాలే. మనం బూడిద గుమ్మడికాయ తొక్క తీస్తాం. తీపి గుమ్మడికాయ తీయవచ్చు, తీయకపోవచ్చు. ఆనపకాయ అదే సొరకాయ దానికి అస్సలు తీయఖ్ఖర్లేదు.

మళ్ళీ అంతర్జాలంమీద పడ్డాను. పూర్వం అంటే ఇరుగమ్మనో పొరుగమ్మనో అడగాలి కానీ ఇప్పుడు అన్నిటికీ అంతర్జాలమే కదా సర్వరోగనివారిణిలా. చూడాలే కానీ రెసిపీలు కుప్పలుతిప్పలు. నీకు తెలుసో తెలీదో అమెరికనుల రెసిపీలు సుమారుగా అన్నీ ఒక్కలాగే ఉంటాయి. పొయ్యిమీద గిన్నెలో ముక్కలు పడేసి కాస్సేపు ఉడకపెట్టో లేదా పొయ్యి అదేలే అవెనులో పెట్టో ఉప్పూ, మిరియాలపొడి చల్లుకోమంటారు. ఇంత సుళువుగా కాదులే. కొలతలు, కాలమానాలూ, గిన్నెరకాలూ యజ్ం చేస్తున్నంత వివరంగా ఇస్తారు. ఇంక ఉప్పు కాకపోతే బటర్. అంతే. మరో రెసిపీ చక్రాల్లా తరిగి ఆలివు నూనెలో మూడు నిముషాలు దోరగా వేయించుకు మళ్లీ ఉప్పూ మిరియాల పొడి… ఈ రెసిపీలు మనతెలుగు నాలుకకి ఆనవు.

తెలుగు రెసిపీలు కూడా కనిపించేయి కానీ పద్ధతులు సుదీర్ఘంగా ఉన్నాయి. నాకు తేలిగ్గానూ త్వరగా అయిపోయేవిగానూ కావాలి.

ఇహ ఇది కాదు పని అని నా రెసిపీ నేనే సృష్టించుకున్నాను. నిజానికి నాకో recipe template ఉంది. అవునమ్మా అసలు కథ – 3 పుటల వంటలపుస్తకం ఇక్కడా మొదలయింది. అది సుమారుగా ఇలా ఉంది.

ఏ కూరైనా సరే ముక్కలు తరుక్కో.

నూనె కాచి ఆవాలూ, మినప్పప్పూ, ఎండు మిరపకాయలూ నీకు తెలుసు కదా పోపు.

మూకుట్లోనో ముక్కలు పట్టే గిన్నెలోనో పోపసి అందులో కూర ముక్కలు పడేసి, ఇన్ని నీళ్ళు చల్లి మూత పెట్టి ఉడకనియ్యి.

లేదా –

మూకుట్లో నూనె వేసి అందులో ముక్కలు పడేసి ఉప్పు చల్లి మూత పెట్టు కూరముక్కలు ఉమ్మగిల్లేవరకూ. ఆ తరవాత మూత తీసి, కారం చల్లి మరి కొంచెంసేపు వేయించు. కరకరలాడేలా కావాలంటే మరో రెణ్ణిముషాలు వేగనియ్యి. మధ్యమధ్యలో కలుపుతూ ఉండు సుమా మాడిపోకుంండా.

నాకు కొన్ని ఆపద్ధర్మం పొడులు రెండున్నాయి.

  1. కూర పొడి

శనగపప్పు, మినప్పప్పు, ఎండు మిరపకాయలు, ధనియాలు, జీలకర్ర వేయించి పొడి కొట్టి పెట్టుకుంటాను ఏ కూర వేయించినా ఆ పొడి ఓ చెంచాడు చల్లేస్తే అద్భుతమైన రుచి వచ్చేస్తుంది. ఈ పొడిలోనే మెంతిపొడి కూడా కలిపితే కొన్ని కూరల్లో బాగుంటుంది. కొబ్బరికోరు కూడా కలపొచ్చు కావలిస్తే.                                                       కూరలు వంకాయ, చిక్కుడుకాయ, కాకరకాయ (ఇది అందరికీ రుచించకపోవచ్చు), దొండకాయాను. బెండకాయ అయితే ధనియాలపొడి చాలు.

  1. నువ్వులపొడి

నువ్వులు, ఎండుమిరపకాయలు దోరగా వేయించి, ఉప్పు కలిపి పొడి కొట్టి పెట్టుకుంటాను. కాలిఫ్లవర్ వేయించో కాబేజీ పోపేసో ఈ పొడి చల్లితే చాలు ఎక్కళ్ళేని రుచీనూ.

ఇంకా పచ్చికారం, కొత్తిమీర కారం లాటివి ఉన్నాయి. అవీ అంతే. పచ్చిమిరపకాయలు, ఉల్లిపాయలు, ఉప్పు ముద్దగా నలగ్గొట్టి ఉడికిన కూరలో కలిపితే పచ్చికారం.

కొత్తిమీర, పచ్చిమిరపకాయలు, ఉల్లిపాయలు, ఉప్పు ముద్దగా నూరుకుని ఉడికినకూరలో కలిపేస్తే కొత్తిమీర కారం.

అలాగే ఫలహారాలూను. ఒక ఉదాహరణ చెప్తాన. చల్ల పొంగరాలు తలపెట్టేవనుకో.

రవ, మైదా (నేను గోధుంపిండి వాడతాను), బియ్యప్పిండి సమపాళ్ళలో పెరుగులో కలిపుతాను.  రవ కొంచెం ఎక్కువ వేస్తే ఎక్కువ కరకరలాడతాయి. ఈ పిండిలో

కారం కావలసినంత

ఉప్పు పట్టినంత

ఉల్లిపాయముక్కలు ఇష్టం వచ్చినంత

జీలకర్ర తోచినంత

అల్లం ముక్క – ఫరవాలేదనిపించేంత వేస్తాను.

ఈ సరుకంతా బ్లెండరులో పడేసి కచ్చా పచ్చా నలిగేలా నాలుగు క్షణాలు తిరగనిస్తాను. ఆ ముద్ద ముందు కలుపుకున్న పిండిలో కలిపేయడమే. ఇది –

అ) రొట్టెలపిండిలా గట్టిగా కలిపితే పకోడీల్లా వేయించుకోవచ్చు. ఇవే చల్ల పొంగరాలు.

ఆ) నీళ్ళు కలిపి పల్చగా దోసెలపిండి చేసుకుంటే రవదోసె.

అంతే నా వంటలు.

అన్నట్టు అసలు మొదలు పెట్టింది విష్ణుచక్రంకాయ ఏం చెయ్యడమా అని కదూ. ఇంకా ఏమీ చెయ్యలేదు.

000

(జులై 21, 2016)

గ్రంధకర్త మాలతి

పేరు నిడదవోలు మాలతి. మంచి తెలుగులో రాసిన కథలు చదువుతాను. చక్కని తెలుగులో రాయడానికి ప్రయత్నిస్తాను.

6 thoughts on “మనలో మనమాట 21 – నా వంటలపుస్తకం రెండే పుటలు!”

  1. పొడులందున దేనినయిన
    గడగడ కలుపవలెనోయి గట్టి తెలుగు వం
    టదురు, చిటికెడుప్పుల మూ
    కుడు బెట్టు ఘుమఘుమలెల్ల కుదురును గనుమా !

    జిలేబి

    Liked by 1 వ్యక్తి

  2. తినడానికి బతకడమా, బతకడానికి తినడమా అన్న సదసత్సంశయం వినే ఉంటారు. నామటుకు నాకు ఇది ఎల్లవేళలా ఒక్కలాగే ఉండదనిపిస్తుంది. ఓరోజు అలాగా, ఓ రోజు ఇలాగా మారిపోతూ ఉంటుంది.

    ఇష్టం

  3. మీ టపా చదువు తుంటే ఉద్యోగంమానేసి ఎంచక్కా వంటలు చేసుకుంటూ రుచులను ఆస్వాదించాలనిపిస్తోంది.

    Liked by 1 వ్యక్తి

టపాలో చర్చించిన అంశంమీద వ్యాఖ్యానాలు తెలుగులో రాసిన వ్యాఖ్యలు మాత్రమే అంగీకరింపబడతాయి. తెంగ్లీషులో రాసిన వ్యాఖ్యలు కూడా నాకు సమ్మతం కాదు. కోరుతున్నాను

Fill in your details below or click an icon to log in:

WordPress.com Logo

You are commenting using your WordPress.com account. Log Out / మార్చు )

Twitter picture

You are commenting using your Twitter account. Log Out / మార్చు )

Facebook photo

You are commenting using your Facebook account. Log Out / మార్చు )

Google+ photo

You are commenting using your Google+ account. Log Out / మార్చు )

Connecting to %s